ការិយាល័យព័ត៌មាន(បុគ្គលិកប្រចាំការ)ទូរស័ព្ទ 092 464 205
ភ្នំពេញ៖តារាកំប្លែងស្រីឈ្មោះពិត នាង ស្រីនិច ហៅប្រិមប្រិយ។ រូបថត ភ្នំពេញប៉ុស្តិ៍, តារាកំប្លែងស្រី ប្រិមប្រិយ មានសម្រស់កាន់តែស្រស់ផូរផង់ ត្រូវមហាជនកោតសរសើរ។
ស្របពេលបច្ចុប្បន្ននេះ រូបឆោមក៏កាន់តែស្រស់ស្អាត សាច់សខ្ចី តារាកំប្លែងស្រី ដែលផុសភាពល្បីជាមួយក្រុមកំប្លែងនាយ កុយ និងឧស្សាហ៍សម្តែងជាដៃគូនឹងតារាកំប្លែងមាឌល្អិតចិត្តធំ នាយ ក្រិន វោហារមាត់ដាច នាង ប្រិមប្រិយ កំពុងតែផុសផុលខ្លាំងក្នុងការផ្សព្វផ្សាយលើទំព័រហ្វេសប៊ុកបើករបរលក់ផលិតផលឡេសម្អាងកាយតាមអនឡាញនោះ ក៏ផ្ទុះការកោតសរសើរពីមហាជននូវរូបសម្រស់របស់នាង។
ការលេចចេញនូវពាក្យលាន់មាត់ កោតសរសើរពីរូបសម្ផស្សតារាកំប្លែងស្រី ដែលមានឈាមជ័រអ្នកសិល្បៈដែរ គឺមានឪពុកម្តាយជាអ្នកសម្តែងល្ខោនទាំង ២ នៅសម័យមុន ក្រោយពីនាង ប្រិមប្រិយ បង្ហើរសារខ្លី ១ ឃ្លា ដែលអមដោយរូបថត ៤-៥ សន្លឹកក្នុងទឹកមុខសប្បាយចិត្តថា៖ «ខ្លាចបងប្អូនភ្លេចមុខ»។
រំពេចនោះ មានអ្នកគាំទ្រចូលទៅចុច Likes ជាហូរហែ និង Comment សរសើរពីសម្រស់របស់តារាកំប្លែងស្រី ដែលកំពុងតែអភិវឌ្ឍខ្លួនជាតារាចម្រៀងទាំងប្រពៃណី និងសម័យ ដើម្បីពង្រីកទីផ្សារសិល្បៈ ខណៈក៏មានមុខរបរលក់ផលិតផលអនឡាញផងដែរ។ ភាគច្រើនឃើញមហាជនចាប់អារម្មណ៍ និងកត់សម្គាល់លើចំណុចរួមតែមួយគត់ គឺភាពប្រែប្រួលខ្លាំងនៃរូបសម្ផស្សរបស់ ប្រិមប្រិយ ក៏ព្រលយពាក្យសរសើរភ្លាមថា៖ «ស្អាតណាស់! ស្អាតមែនទែនឥឡូវ!មិនអាចភ្លេចទេ តារាស្រីស្អាតនោះ! អត់ភ្លេចទេមនុស្សល្អ»។
គេក៏ឃើញមានអ្នកនិយាយចំអន់បង្កប់ន័យសរសើរផងដែរថា៖ «ឈប់សិន អ្នកត្រូវផាកពិន័យជាប្រាក់ ២៥ ០០០ រៀល ពីបទផុសរូបស្អាតៗ មិនក្រែងចិត្តអ្នកដទៃ»។
មួយរយៈចុងក្រោយនេះ តារាកំប្លែងស្រីមានឈ្មោះពិត នាង ស្រីនិច ហៅនាង ប្រិមប្រិយ មមាញឹកខ្លាំងនឹងអាជីវកម្មលក់ផលិតផលសម្អាងកាយ ហាក់ធ្វើឲ្យនាងភ្លេចគិតគូររឿងម្ចាស់បេះដូងបុរសគូស្នេហ៍ខ្មែររស់នៅអាមេរិកបានសាងស្នេហ៍ជិត ២ ឆ្នាំនោះបាត់ហើយមើលទៅ។
ប៉ុន្តែនាង ប្រិមប្រិយ ប្រាប់ភ្នំពេញ ប៉ុស្តិ៍ ថា៖ «យើងទាំង ២ នៅរក្សាសម្ព័ន្ធភាពត្រឹមជាគូស្នេហ៍ដូចនៅពេលបច្ចុប្បន្ននេះសិនចុះ គឺថាពុំទាន់មានគម្រោងអ្វីបន្ថែមឲ្យលើសពីនេះ នៅឡើយទេ សម្រាប់ពួកយើងនោះ។ នាងខ្ញុំគិតថា ចង់ប្រើពេលវេលាគិតរឿងការងារសិល្បៈឲ្យច្រើនបន្តិច ទាន់មានឱកាស និងស្របទៅនឹងកាលៈទេសៈល្អ»៕
