📍ការិយាល័យគ្រប់គ្រង គេហទំព័រ ផែនដីថ្មី|PDT-News.com (បុគ្គលិកប្រចាំការ) ☎️Tel/tegram 012 296 494
ភ្នំពេញ ៖ តាមសេចក្តីរាយការណ៍បឋមបានឲ្យដឹងថា លោកឧត្តមសេនីយ៍ឯក ស៊ុន ហួរ ទីប្រឹក្សាក្រសួងមហាផ្ទៃ ត្រូវបានកម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួននារសៀលថ្ងៃទី២៦ ខែសីហា ឆ្នាំ២០២៤ តាមបញ្ជាពីស្ថាប័នអយ្យការ ពាក់ព័ន្ធករណីរំលោ.ភលើទំនុកចិត្ត ដែលមានទំហំទឹកប្រាក់ប្រមាណជាង៣លានដុល្លារអាមេរិក ។
ករណីការឃាត់ខ្លួនលោកឧត្តមសេនីយ៍ឯក ស៊ុន ហួរ ទីប្រឹក្សាក្រសួងមហាផ្ទៃនោះ បន្ទាប់ពីសមត្ថកិច្ចបានកោះអញ្ជើញលោកឧត្តមសេនីយ៍ឯក ស៊ុន ហួរ ទៅឆ្លើយបំភ្លឺតាមពាក្យបណ្តឹងរបស់ភាគីដើមចោទប្ដឹងចោទប្រកាន់ថា បានយកប្លង់ដីចំនួន៧ប្លង់ ទៅដាក់យកប្រាក់ពីដើមបណ្តឹងមាន៣ករណី សរុបទឹកប្រាក់ប្រមាណជាង៣លានដុល្លារអាមេរិក ។
តាមការបង្ហើបឲ្យដឹងពីសមត្ថកិច្ចថា ប្លង់ដីនោះ នៅពេលដាក់តម្កល់យកប្រាក់ គឺឈ្មោះឧត្តមសេនីយ៍ឯក ស៊ុន ហួរ ប៉ុន្តែនៅពេលភាគីដើមបណ្តឹងបានយកទៅផ្ទៀងផ្ទាត់នៅខាងសូរិយោដី ទើបមានការឆ្លើយតបមកវិញថា ជាប្លង់ដីមិនមែនឈ្មោះ ស៊ុន ហួរ ទៅវិញ ។ ចំណុចនោះហើយ ដែលធ្វើឲ្យម្ចាស់ប្រាក់កើតទុកមិនសុខចិត្តប្តឹងសមត្ថកិច្ចឲ្យជួយចាត់ការ ពាក់ព័ន្ធបទល្មើសព្រហ្មទណ្ឌ ។
អង្គភាពយើងទាក់ទងរកការបំភ្លឺពីលោកឧត្តមសេនីយ៍ ស៊ុន ហួរ ដែលរងនូវបណ្តឹងចោទប្រកាន់ខាងលើនោះបានទេ នេះគ្រាន់តែជាព័ត៌មានបឋម ដែលបែកធ្លាយចេញពីសមត្ថកិច្ចក្នុងការឃាត់ខ្លួនជនសង្ស័យ តែបើគ្មានការប្រែប្រួលទេ សមត្ថកិច្ចនឹងបញ្ជូនលោកផ្កាយបី ស៊ុន ហួរ ទៅជូនតំណាងអយ្យការអមសាលាដំបូងរាជធានីភ្នំពេញ តាមនីតិវិធី ៕
