ការិយាល័យគ្រប់គ្រង គេហទំព័រ ផែនដីថ្មី (បុគ្គលិកប្រចាំការ) 
Tel/tegram 012 296 494
កំពង់ស្ពឺ ៖ រឿងក្រុមជនខិលខូចឃុបឃិតជាមួយមន្ត្រីខិលខូចមួយចំនួនតូចនៅក្នុងខេត្តកំពង់ស្ពឺតែងតែមានជាហូរហែរ ប៉ុន្តែអាជ្ញាធរនិងជំនាញពាក់ព័ន្ធ ហាក់មិនទាន់អើពើទាល់តែសោះ មិនដឹងថា គាត់ជាប់រវល់ការងារច្រើន ឬមួយក៏មិនបានជ្រាបរឿងគេរុករានទន្ទ្រានយកដីព្រៃរបស់រដ្ឋ យកលេសដាំដំឡូងមី ។ លុះពេលសារព័ត៌មានចេញផ្សាយ បែរជាលេចឮថា ចេញប្លង់ដឺមាស់ជិត១០០ហិកតា ខណៈដែលប្រជាពលរដ្ឋលួចខ្សឹបថា ដីនេះគេគ្រោងលក់ជិត១០០ហិកតា ឯណោះ ទៅឱ្យលោកឧកញ៉ាម្នាក់ ក្នុងគោលបំណងដាំអំពៅ សម្រាប់ទៅថ្ងៃអនាគត ។
ការងារនេះ ថ្នាក់ដឹកនាំត្រូវចាត់មន្ត្រីជំនាញធ្វើការស៊ើបរឿងនេះឱ្យបានដឹងពិតប្រាកដផង កុំឱ្យមានការលើកឡើងខុសៗគ្នា នឹងដើម្បីឱ្យអស់មន្ទិលសង្ស័យថា ជារឿងឃុបឃិតគ្នាលួចលក់ដីព្រៃរបស់រដ្ឋ ហើយចែកលុយគ្នាមិនស្មើនោះ ។
សូមរំលឹកថា ដីព្រៃរបស់រដ្ឋការពារដោយព្រះរាជក្រឹត្យរាប់រយហិកតា ដែលក្រុមជនខិលខូចលួចដាក់គ្រឿងចក្រជីកាយភ្ជួររាល់ ឈូសឆាយ រុករានទន្ទ្រានយកធ្វើជាសម្បត្តិផ្ទាល់ខ្លួន និងលក់បន្តទៅឱ្យអ្នកមានលុយមានអំណាចថែមទៀតផងនោះ ប្រជាពលរដ្ឋបានដាក់ការសង្ស័យថា ទាល់តែមានការឃុបឃិតគ្នាជាប្រព័ន្ធហើយ ទើបក្រុមឈ្មួញខិលខូចនឹងអ្នកមានលុយអ្នកមានអំណាចទាំងអស់នោះ អាចដាក់គ្រឿងចក្រឈូសឆាយរុករានទន្ទ្រានកាន់កាប់ដីព្រៃរបស់រដ្ឋ គ្មានច្បាប់អនុញ្ញាតយកធ្វើជាកម្មសិទ្ធិជាច្រើនហិកតា នៅចំណុចជើងភ្នំប្រាក់ ស្ថិតនៅក្នុងភូមិថ្មី(សូរិយា) ឃុំតាសាល ព្រំប្រទល់ជាមួយភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដោយមិនខ្លាចញញើតនិងផ្លូវច្បាប់ ។
មិនតែប៉ុណ្ណោះ អ្នកកាន់កាប់ដីធ្លីឈ្មោះ(តាប៉ាង) បានទទួលលុយកក់ចំនួន៥០%ពីអ្នកទិញរួចរាល់ហើយ។ ការដាក់គ្រឿងចក្រលួចឈូសឆាយ ភ្ជួររាល់ដី ហើយយកលេសដាំដំឡូងក្នុងដីព្រៃរបស់រដ្ឋនេះ ប្រជាពលរដ្ឋបានដាក់ការសង្ស័យ មានការបើកភ្លើងខៀវពីមន្ត្រីមូលដ្ឋាន មេភូមិសំរោង និងមន្ត្រីបរិស្ថាន ព្រមទាំងអាជ្ញាធរស្រុកឱរ៉ាល់ មិនអាចឆ្លើយយករួចខ្លួនបានឡើយ ដោយហេតុថា: ត្រឹមតែរយៈពេលខ្លីសោះ ដីព្រៃរបស់រដ្ឋដែលការពារដោយព្រះរាជក្រឹត្យ ជាច្រើនរយហិកតា នៅចំណុចជើងភ្នំប្រាក់ ស្ថិតនៅក្នុងភូមិថ្មី (សូរិយា) ឃុំតាសាល ព្រំប្រទល់ជាមួយភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ត្រូវបានឈ្មួញនឹងអ្នកមានលុយមានអំណាច អាចដាក់គ្រឿងចក្រឈូសឆាយរុករានទន្ទ្រានកាន់កាប់យកធ្វើជាកម្មសិទ្ធិបានយ៉ាងរលូន ខណៈអាជ្ញាធរមាន សមត្ថកិច្ច និងមន្ត្រីជំនាញពាក់ព័ន្ធហាក់ធ្វើមិនដឹងមិនឮ និងគ្មានចំណាត់ការទាល់តែសោះ ។
ប្រភពពីប្រជាពលរដ្ឋដែលរស់នៅក្នុងឃុំតាសាល និងឃុំត្រពាំងជោ នៃស្រុកឱរ៉ាល់ ខេត្តកំពង់ស្ពឺ បានឲ្យដឹងទៀតថា ជនខិលខូចដែលហ៊ានយកគ្រឿងចក្រទៅធ្វើការឈូសឆាយរុករានទន្ទ្រានដីព្រៃរបស់រដ្ឋ ដែលការពារដោយព្រះរាជក្រឹត្យនៅចំណុចជើងភ្នំប្រាក់នេះ គ្មានច្បាប់អនុញ្ញាតនោះ ត្រូវបានគេស្គាល់ឈ្មោះ តាប៉ាង អាយុប្រហែល៦០ឆ្នាំ បានធ្វើសកម្មភាពលួចឈូសឆាយដីព្រៃរបស់រដ្ឋទាំងយប់ទាំងថ្ងៃយ៉ាងគគ្រឹកគគ្រេង ហាក់គ្មានខ្លាចញញើតច្បាប់សូម្បីតែបន្តិច ដោយសារតែអាជ្ញាធរពាក់ព័ន្ធជាច្រើនស្ថាប័នមិនធ្វើការបង្ក្រាបសោះឡើយ ។
ក្រុមជនខិលខូចអាចដាក់គ្រឿងចក្រឈូសឆាយទន្ទ្រានកាន់កាប់ដីព្រៃរបស់រដ្ឋយកធ្វើជាកម្មសិទ្ធិ ជាច្រើនហិកតា នៅចំណុចជើងភ្នំប្រាក់ ស្ថិតនៅក្នុងភូមិថ្មី(សូរិយា) ឃុំតាសាល ព្រំប្រទល់ជាមួយភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ យ៉ាងស្រួល ដោយមិនមានការខ្វាយខ្វល់ពីផលប៉ះពាល់ ឬចាត់វិធានការតាមផ្លូវច្បាប់ណាមួយមកលើពួកគេនោះឡើយ ប្រជាពលរដ្ឋដាក់ការសង្ស័យថាអាជ្ញាធរ និងជំនាញពាក់ព័ន្ធបានលាភសក្ការហើយ ទើបគ្មានឆន្ទៈក្នុងការថែរក្សានិងអភិរក្សដីព្រៃការពារដោយព្រះរាជក្រឹត្យបែបនេះនោះ ។
ប្រជាពលរដ្ឋរស់នៅក្នុងស្រុកឱរ៉ាល់ បាននិយាយឲ្យដឹងទៀតថា បើគ្មានការបើកដៃពីមន្ត្រីបរិស្ថាន មេឃុំតាសាល មេឃុំត្រពាំងជោ ក៏ដូចជាអាជ្ញាធរស្រុកឱរ៉ាល់ ទេនោះ គឺសកម្មភាពដាក់គ្រឿងចក្រឈូសឆាយរុករានទន្ទ្រានកាន់កាប់ដីព្រៃរបស់រដ្ឋ នៅក្នុងភូមិសាស្ត្រស្រុកឱរ៉ាល់ មិនអាចកើតឡើងបានទេ។
ប្រជាពលរដ្ឋមួយរូបលើកឡើងក្នុងលក្ខណមិនបញ្ចេញឈ្មោះថា ដីរបស់ឈ្មោះ (តាប៉ាង) នៅចំណុចជើងភ្នំប្រាក់នោះ ត្រូវបានរៀបចំលក់ទៅឱ្យអ្នកមានលុយមានអំណាចម្នាក់នៅក្នុងស្រុកឱរ៉ាល់ ដែលមានទំហំជាង៣០០ហិកតា ។ ហើយដីនោះ មានប្លង់រឹងត្រឹម៦០ទៅ៧០ហិកតាតែប៉ុណ្ណោះ ដោយលក់ក្នុង១ហិកតាក្នុងតម្លៃ៥០០០ដុល្លារអាមេរិក(5000$) ហើយទូទាត់លុុយបានចំនួន៥០ភាគរយហើយ សរុបទឹកលុយទាំងអស់ជាង១លានដុល្លារសហរដ្ឋអាមេរិកឯណ្ណោះ។
ប្រជាពលរដ្ឋដដែលបានបន្តទៀតថា អ្នកមានលុយមានអំណោច គ្រោងឱ្យតាប៉ាង និងអ្នកពាក់ព័ន្ធរៀបចំដីធ្លីទំហំជាង១០០០ហិកតា បន្ថែមទៀតដើម្បីធ្វើចំការ បំពេញតម្រូវការទីផ្សារដែលគេចង់បាន បើទោះបីជាពាក់ព័ន្ធជាមួយដីរដ្ឋគ្រប់គ្រង ឬដីរបស់ប្រជាពលរដ្ឋ ក៏ដោយគេត្រូវតែទិញយកឱ្យបាន ។
សូមបញ្ជាក់ផងដែរថា កាលពីពេលកន្លងទៅនៅថ្ងៃទី០៦ ខែកុម្ភៈ ឆ្នាំ២០២៣ ក្រុមអ្នកសារព័ត៌មានជាច្រើនអង្គភាពបានចុះទៅដល់ចំណុចទីតាំងដីខាងលើឃើញថា មានគ្រឿងចក្រអេស្កាវទ័រ{ហៅថាអាអ៊ិច}ចំនួនពីរគ្រឿងកំពុងតែធ្វើសកម្មភាពឈូសឆាយដីព្រៃរបស់រដ្ឋអស់ជាច្រើនហិកតា ដូចជាការលើកឡើងរបស់ប្រជាពលរដ្ឋពិតប្រាកដមែន ក្រោយពីឃើញក្រុមអ្នកសារព័ត៌មាន តៃកុងអេស្កាវទ័រ{ហៅថាអាអ៊ិច} បានបើកគ្រឿងចក្របុករបងរត់ដើម្បីយកគ្រឿងចក្រទៅលាក់ទុក ភ្លាមៗនោះមានបុគ្គលម្នាក់បើករថយន្តមកដែលគេស្គាល់ឈ្មោះ {តាប៉ាង} ជាអ្នកយកគ្រឿងចក្រមកឈូសឆាយដីព្រៃរបស់រដ្ឋខាងលើនោះ បានធ្វើកាយវិការច្រងេងច្រង៉ាង ហើយបានឲ្យក្រុមអ្នកសារព័ត៌មានយើងទៅផ្ទះលោកដើម្បីនិយាយគ្នា ប៉ុន្តែអ្នកសារព័ត៌មានមិនបានធ្វើតាមការអញ្ជើញរបស់ តាប៉ាងនោះឡើយ។
ប្រជាពលរដ្ឋរស់នៅក្នុងស្រុកឱរ៉ាល់ បានស្នើសុំយ៉ាងទទូចដល់ លោក វ៉ី សំណាង អភិបាលខេត្តកំពង់ស្ពឺ គួរចាត់មន្ត្រីជំនាញចុះ ពិនិត្យទីតាំងដីព្រៃរបស់រដ្ឋដែលការពារដោយព្រះរាជក្រឹត្យ ឡើងវិញផង ពីព្រោះត្រឹមតែរយៈ ពេលខ្លីសោះ ដីព្រៃរបស់រដ្ឋជាច្រើនរយ ពាន់ ហិកតា បានក្លាយជាវាលរហោស្ថានអស់ទៅហើយ ។
ជុំវិញករណីក្រុមជនខិលខូចលួច ដាក់គ្រឿងចក្រឈូសឆាយរុករានទន្ទ្រានដីព្រៃរបស់រដ្ឋ ដែលការពារដោយព្រះរាជក្រឹត្យ គ្មានច្បាប់អនុញ្ញាតិខាងលើនេះ គេហទំព័រ ផែនដីថ្មី មិនអាចសុំការបំភ្លឺពី {តាប៉ាង} បានទេដោយមិនមានលេខទូរស័ព្ទសម្រាប់ធ្វើការទំនាក់ទំនង ។
ចំណែកលោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ ពាក់ព័ន្ធនិងការលើកឡើងខាងលើនេះ គេហទំព័រ ផែនដីថ្មី ក៏មិនអាចទាក់បាននោះទេ។ រីឯលោក ហ៊ុល ម៉ារ៉ា ប្រធានការិយាល័យ ដែនជម្រកស្រុកឱរ៉ាល់ ខេត្តកំពង់ស្ពឺ បានឱ្យអ្នកយកព័ត៌មានថា លោកជាប់រវល់។
កន្លងទៅ កាលពីអំឡុងខែកុម្ភៈ ឆ្នាំ២០២៣ លោក អោម ម៉ាក់ធារី អតីតប្រធានមន្ទីរបរិស្ថានខេត្តកំពង់ស្ពឺ រឿងដីធ្លីក្បែរភ្នំប្រាក់នេះ លោកបានចាត់ឱ្យមន្ត្រីជំនាញក្រោមឱវាទចុះពិនិត្យរួចហើយ។ ថែមទាំងរាយការណ៍ជូនគណបញ្ជាការឯកភាព ចេញសេចក្តីសម្រេចដកហូតមកជាសម្បត្តិរដ្ឋវិញហើយ។ ប៉ុន្តែចាប់តាំងពីពេលនោះមក មិនទាន់ឃើញមានសេចក្តីសម្រេចណាមួយឡើយ ហើយដីនោះ អ្នកគ្រប់គ្រងបន្តធ្វើការឈូសឆាយ ដាំដំឡូងមី ហើយថែមទាំងលេចឮមកថា គេបានលក់ដូរបន្តទៅឱ្យអ្នកមានលុយមានអំណាចទៀតផង ។
កន្លងទៅ កាលពីអំឡុងខែកុម្ភៈ ឆ្នាំ២០២៣ លោក អោម ម៉ាក់ធារី អតីតប្រធានមន្ទីរបរិស្ថានខេត្តកំពង់ស្ពឺ រឿងដីធ្លីក្បែរភ្នំប្រាក់នេះ លោកបានចាត់ឱ្យមន្ត្រីជំនាញក្រោមឱវាទចុះពិនិត្យរួចហើយ។ ថែមទាំងរាយការណ៍ជូនគណបញ្ជាការឯកភាព ចេញសេចក្តីសម្រេចដកហូតមកជាសម្បត្តិរដ្ឋវិញហើយ។ ប៉ុន្តែចាប់តាំងពីពេលនោះមក មិនទាន់ឃើញមានសេចក្តីសម្រេចណាមួយឡើយ ហើយដីនោះ អ្នកគ្រប់គ្រងបន្តធ្វើការឈូសឆាយ ដាំដំឡូងមី ហើយថែមទាំងលេចឮមកថា គេបានលក់ដូរបន្តទៅឱ្យអ្នកមានលុយមានអំណាចទៀតផង ។
ប្រជាពលរដ្ឋបានបង្ហើបថា នៅពេលថ្មីៗនេះលេចលឺថា ការលក់ដីព្រៃនេះកំពុងតែចង្រូងចម្រាស់គ្នានៅឡើយ ដោយសារតែអ្នកសារព័ត៌មានជាច្រើនអង្គភាពធ្វើការផ្សព្វផ្សាយ។ ហើយលុយកក់៥០ភាគរយនោះ ម្ចាស់លុយមិនទាន់ឱ្យគ្រប់ចំនួន ព្រោះដីមិនទាន់គ្រប់ចំនួនដែលគេចង់បាន។
ពាក់ព័ន្ធរឿងរុករានទន្ទ្រានដីព្រៃរបស់រដ្ឋការពារដោយព្រះរាជក្រឹត្យនេះដែរ គេហទំព័រ ផែនដីថ្មី មិនអាចសុំការបំភ្លឺពីលោក ងួន វាសនា អភិបាលស្រុកឱរ៉ាល់ និងលោក ច័ន្ទថេត ថានរៈ ប្រធានមន្ទីរបរិស្ថានខេត្តកំពង់ស្ពឺ ដើម្បីសួរបន្ថែម ប៉ុន្តែខលមិនចូល ។
ករណីខាងលើពលរដ្ឋដែលដឹងរឿងធ្វើការសំណូមពរដល់ឯកឧត្តមទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ មេត្តាជួយស្រាវជ្រាវលើរឿងលក់ដីព្រៃភ្នំរបស់រដ្ឋក្បែរភ្នំប្រាក់ ក្នុងភូមិសំរោង ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺផង៕
