ភ្នំពេញ៖ ឯកឧត្តមរដ្ឋមន្រ្តី នេត្រ ភក្ត្រា បានជំរុញអ្នកសារព័ត៌មានឲ្យពង្រឹង និងប្រើប្រាស់ភាសាអក្សរសាស្ដ្រជាតិ ក្នុងវិស័យសារព័ត៌មានឲ្យបានត្រឹមត្រូវ ជាពិសេសតាមបណ្ដាញសង្គមជាដើម ដើម្បីលើកតម្កើងអក្សរសាស្ដ្រជាតិខ្មែរ។
ការថ្លែងនេះរបស់លោក នេត្រ ភក្ត្រា រដ្ឋមន្រ្តីក្រសួងព័ត៌មាន ក្នុងសិក្ខាសាលាតម្រង់ទិស ដើម្បីរៀបចំស្តង់ដារប្រតិបត្តិរួមសម្រាប់វិជ្ជាជីវៈសារព័ត៌មាន នាព្រឹកថ្ងៃទី១៩ ខែមេសា ឆ្នាំ២០២៤ នាទីស្តីការក្រសួង។
រដ្ឋមន្រ្តី នេត្រ ភក្ត្រា មានប្រសាសន៍ថា «កត្តានៃកម្រិតអក្សរសាស្ដ្រគឺសំខាន់ណាស់ ប្រសិនបើយើងសរសេរអក្សរខុសក៏គេមិនមើលដែរ ទោះបីអង្គភាពយើងខ្លាំងយ៉ាងណាក្តី។ ដែលការណ៍នេះក៏ត្រូវដាក់ក្នុងធម្មនុញ្ញវិជ្ជាជីវៈសារព័ត៌មាន ដែលត្រូវប្រកាន់ខ្ជាប់នូវអក្សរខ្មែរដើម្បីកុំឲ្យខុស»។
ជាមួយគ្នានេះ រដ្ឋមន្រ្តី នេត្រ ភក្ត្រា លើកឡើងថា បច្ចប្បន្ន ក្មេងៗជំនាន់នេះបានប្រើប្រាស់ភាសាខ្មែរដោយមានសំនៀងខ្មែរតែជាអក្សរឡាតាំងក្នុងបណ្ដាញសង្គមផ្សេងៗដែលនេះជាក្ដីបារម្ភមួយអាចនឹងបាត់បង់អត្តសញ្ញាណនាពេលអនាគត។ លោកថាដូច្នេះសម្រាប់អ្នកសារព័ត៌មានក៏មានតួនាទីអភិរក្សអក្សរសាស្ដ្រខ្មែរដែរ។
«សម្រាប់ខ្ញុំគឺខ្ញុំប្រកាន់ខ្ជាប់នូវអក្សរសាស្ដ្រ។ ដូចជាក្នុងហ្វេសប៊ុកខ្ញុំមិនសរសេរជាភាសាអង់គ្លេសនោះទេ។ ដែលកាលពីដំបូងៗមែន ប៉ុន្តែឥឡូវគឺអត់ទេ គឺប្រើតែភាសាខ្មែរមួយសុទ្ធ គឺដើម្បីលើកតម្កើងអក្សរសាស្ដ្រជាតិរបស់យើង»។ នេះជាប្រសាសន៍របស់ រដ្ឋមន្រ្តី នេត្រ ភក្ត្រា។
សូមជម្រាបជូនថា ក្រសួងព័ត៌មានបានរៀបចំសិក្ខាខាងលើនេះឡើង ដើម្បីប្រមូលធាតុចូល ហើយឈានទៅបង្កើត«ធម្មនុញ្ញវិជ្ជាជីវៈសារព័ត៌មាន» ស្របតាមបរិការណ៍បច្ចុប្បន្ន។ ក្រសួងអះអាងថា ធម្មនុញ្ញនេះនឹងពង្រឹងក្រមសីលធម៌វិជ្ជាជីវៈសារព័ត៌មាននៅកម្ពុជា៕
